30 ГОДИНИ „ЦКА – ПХВ“ И КЛУБ НА МЛАДИ
Тесен беше просторот на големата сала на НУЦК „Григор Прличев“ – Охрид за сите емоции, спомени, прегратки и приказни што вчера се собраа на едно место, по повод одбележувањето на 30 години од имплементацијата на програмата ЦКА-ПХВ на локално ниво и 30 години постоење на Клубот на млади при Црвен крст Охрид. Вечерта беше повеќе од јубилеј – беше средба на генерации, прослава на хуманоста и потсетник на 30 години посветеност, солидарност и младинска енергија.
Целта на настанот беше да се одбележи патот изоден низ годините, да се вреднува придонесот на сите генерации волонтери и да се потврди значењето на младите во градењето похумано општество. 30 години ЦКА-ПХВ значат 30 години идеи претворени во дела, потреби препознаени и промени создадени со сопствени раце. Тоа се 30 години во кои младите учеа дека не мора да бидат возрасни за да направат нешто големо, ниту моќни за да остават трага – доволно е да имаат волја, храброст и срце за другите.
30 години Клуб на млади значат 30 години создавање лидери, пријателства, иницијативи и приказни што продолжуваат да живеат и долго по завршувањето на волонтерскиот ангажман. Овој јубилеј уште еднаш докажа дека младите на Охрид не се само иднината на заедницата, туку нејзината активна сегашност – луѓе кои препознаваат проблеми, нудат решенија и не чекаат некој друг да го направи првиот чекор. Зад секоја активност, секоја насмевка и секоја подадена рака стои пораката дека промената започнува тогаш кога некој ќе одлучи да се грижи.
Посебен момент на вечерта беше спојувањето на генерациите преку разговорот со Сашко Георгиески, првиот претседател на Клубот на млади, и Мимоза Ставрева, првата потпретседателка на Клубот, која денес ја извршува функцијата секретар на Црвен крст Охрид. Нивното учество донесе поглед кон почетоците, предизвиците и вредностите врз кои се градел Клубот, поврзувајќи го неговото минато со сегашноста и иднината. Поддршката за младите беше потврдена и преку обраќањата на Весна Терзиоска, претседателка на Црвен крст Охрид, и Перчо Божиновски, претседател на Советот на Општина Охрид, кои со своите говори ја истакнаа важноста на младинскиот активизам и поддршката што младите ја добиваат во своите заложби за подобра заедница. Вечерта беше збогатена и со театарската претстава „Еден мал чекор“, изведена од екипата на „Вдиши Театар“, како и со музичкиот настап на бендот на Клубот на млади, кои внесоа дополнителна емоција, креативност и енергија во прославата.
Вчерашната вечер не беше само прослава на едно минато, туку потврда дека оваа приказна продолжува – со нови лица, нови идеи и исти вредности. Зашто волонтерството не завршува со една генерација, хуманоста не познава временски граници, а пламенот на младоста не згаснува сè додека има некој подготвен да го пренесе понатаму. И така, низ музика, театар, емоции и спомени, под ѕвездите на Охрид повторно се разгоре огнот на младоста – огнот што веќе 30 години ги поврзува срцата и го осветлува патот кон похумана иднина.
30 години млади. Илијадници мали чекори. Една иста мисија – ЧОВЕЧНОСТ
